顽石の碎碎念

前日喺PAVILION等朋友时，行行吓街入咗一间卖精品嘅店，唸住随便睇睇逛逛啦，点知畀我发现咗呢本好有童年感觉嘅记事本，好锺意啊！呢，就系中间朱古力色果本咯。 封面有好浓郁七，八十年代嘅味道。睇吓！绿色塑胶兵，蛇棋，星星棋，飞行棋，百兽棋，水枪，玻璃珠，口香糖，WE ARE FAMILY牌。。。我都曾经拥有过嘎！除咗呢啲仲有好多好多数之不尽。嗰只铁皮青蛙，上次去台湾嘅时侯见到就买咗只嚟收藏。呢本记事本除咗封面有我嘅回忆之外，佢嘅材料仲系用环保再造纸嚟制造嘎。唔驶多加考虑我就即刻买咗呢一本能令我返到过去嘅记事本，好开心啊！ 除咗嗰本新买嘅记事本外，仲有几样收藏品我都好锺意嘅。譬如话嗰只米奇老鼠铁盒，系旧年去香港嘅迪斯尼乐园买嘎，嗰只白色嘅咧系前年去台湾咁啱遇到KUSO创意展买嘅，我好锺意嘎！ 仲有喺左边嘅嗰张古早明信卡，系立体嘎，下边嗰本记事本系我朋友去米兰买返嚟送我嘅，右边嗰本咧就系喺台湾买嘅。不过唸唸下好似买嚟收藏多啲哦，因为我都唔舍得用！

讲起演唱会就令我想起一件陈年旧事。 犹记得几年前，原本有一班几好嘅朋友，但系中间发生咗一点误会，渐渐地与佢地疏远少联络。 记得有一日去咗睇郑秀文喺大马的演唱会，系我一个记者朋友带我去嘅，唔单止免费，仲坐喺很前嘅记者区。但系唔知点解，果班朋友中嘅一个朋友之后走嚟质问我点解要讲大话，冇去睇演唱会点解要骗大家话我有去睇，真系好无辜咯！如果我冇去睇嘅话，咁点解我要咁做啊？骗佢哋话有去睇又系为么咧？唔通睇演唱会系好难得嘅事，要通街话俾大家知，嗮命啊？ 我真系唔需要咁做咯，大大话话一直到今日我都睇过好多场演唱会啦！而且场场都免费嘅，有点仲系坐喺很前嘅位添！郑秀文啦，郭富城啦，孙燕姿啦，F4啦，飞轮海啦，张敬轩啦，张惠妹啦，许志安与苏永康啦等等，仲有一点系冇时间又或者唔方便而冇去添。F4，孙燕姿嘅演唱会我系坐喺第一排，仲可以随意走动影相添，就连佢哋面上嘅痘痘都睇到一清二楚啊！我驶么车大炮骗人认叻啊？真系唔知点解咯！ 不过冇所谓啦，件事都过咗咁多年咯，只系有时去睇演唱会会谂起呢一点回忆啫。虽然与佢哋冇联络，但系都知道佢哋过得唔错。一个去咗美国做工，一个做空少，一个去咗新加坡做工，一个留喺本地做，但系做么就唔知，因为佢一路嚟都神神秘秘嘅，惊人哋知道佢点嘢咁。吖。。。。。。 谂落都要好多谢佢哋嘅，起码喺我嘅生活上添上一段精彩嘅故仔，使我嘅过去唔至于平淡冇奇冇生趣。正所谓“哭有时，笑有时，悲伤有时，欢乐有时”啊嘛！系咪？

突然间回想着往事。 记得以前细嗰去外婆屋企嘅时侯，屋企里除咗外婆，大舅一家，小舅一家之外，仲有一位年纪好大嘅太婆。佢眼朦耳聋，要讲好大声至听到。每次去到，妈妈都会喺佢耳边大大声讲畀佢听边嗰返咗嚟，每次太婆听咗就会露出冇牙的笑容，好可爱。 太婆每次都会坐喺门边嘅藤椅度，食饭喺度，饮水喺度，有时呆呆咁望着门外，好似唸紧嘢咁，系回忆以前抑或盼望未来咧？ 外婆屋企门前有棵芒果树，有一次见到太婆喺度拾树叶，驼背嘅佢拾起树叶睇落好似好吃力，所以我就同细路一起去帮佢手。喺第二朝早离开之前，我仲同细路爬上棵树度掹晒啲开始发黄嘅树叶，唔好畀佢跌落地，咁太婆就唔驶拾树叶啦。见到树上连一片有小小黄嘅树叶都冇晒，觉得好开心，因为太婆可以休息唔驶咁辛苦啦。 哎。。。太婆已经仙游好多年了。依家唸返，其实拾树叶对佢嚟讲未必系一件坏事，起码可以郁动胫骨，唔驶整日坐系度，望着门外数日子，睇时间飞过，一日过一日，睇到时间停哋果一刻。 原来真系唔同年纪，唔同角度，唔同心境睇嘅嘢都有唔同嘅景象，唔同嘅结果。原来小黄叶都有佢唔同嘅故仔嘅。

11月14日，同班朋友去咗云顶睇许志安及苏永康嘅《安康ENCORE演唱会》。 我哋坐喺台前右边嘅位，都算好前嘅啦。坐喺我后排有我嘅同事JOANNE，MING，MING嘅妈妈同埋佢妹妹。唔。。。我个人就觉得舞台设计一般咯，冇乜惊喜，但系现场气氛就几好，观众嘅反应都唔错。 苏永康嘅闲聊功夫几好嘎，好识埋口乖搞气氛。唔单只落台握手，佢仲话会一路走到山顶同粉丝握手就真系守诺言走到山顶喔，一点都唔介意粉丝逼住条路，寸步难行。佢仲一直调侃安仔，笑佢中年危机，性情大变，喜欢人哋虐待佢。譬如捏佢屁股啦，舔佢块面啦，摸佢身体啦等等，哈哈，康仔真衰仔。而安仔（老鼠）身材就胜过康仔好多，就算康仔着Deep V露深沟，都输给安仔咯。安仔多数都深情款款咁唱歌，但系都有走下台同观众作近距离接触嘅。我唔单止同安仔握手，仲有意外收获哦！系么嘢？慢慢话你知啦。 嗱嗱嗱,大家请留意许志安手上戴住嘅白色手套。点解要留意啊？睇落去咪知咯。 咦！佢除低咗左手嘅白色手套要做什么啊？原来佢系准备要丢个白色手套出去啊！ 瞪瞪瞪瞪！你睇，我手上戴住嘅系么嘢？ 冇错啦！就系许志安嘅白色手套啦！话你知啦，丢之前，佢仲抹咗佢块面一下兼kiss咗下添嘎。 左边果嗰就系MING，中间果嗰系JOANNE，右边果嗰咪我咯。 仲有其他嘅相分享，不过就唔系好清，因为相机唔系几靓咯，激气啊！ 《安康ENCORE演唱会》曲目： 安康：(Medley)我的天我的歌+假使有日能忘记+日落旅馆+没有季节的火花 康：情来自有方，有人喜欢蓝，旧爱还是最美，男人不该让女人流泪，爱一个人好难 安：让爱，爱你，前程锦绣，(华星Medley)心血+恋爱片段+男人最痛+彻夜缠绵+灰飞烟灭+男人的感慨+喜欢你是你+雨后阳光 安康：(Unplugged)亲密爱人，我愿意，喜帖街，孤独探戈 嘉宾：(EO2的Eddie)眉来眼去+Ladies' Nite (林建辉)我听见有人叫你宝贝 康：假使有日能忘记，从来未发生，不想独自快乐，（和郑姓女歌迷合唱）从不喜欢孤单一个，越吻越伤心 安：烂泥，半天假，一步一生，一家一减你，昨迟人，唯独你是不可取代 Encore(安，康，Eddie)：梦伴+无心睡眠+Stand Up+冰山大火+爱情陷阱+夏日寒风

每次乘搭MONORAIL时都会遇到以下嘅问题，真系乞我憎咯！ 1. 每朝早早晨8AM左右嘅时段，喺HANG TUAH MONORAIL站都会挤满很多去上班嘅人。每次MONORAIL到站时，啲人就会逼晒去入口处等候入闸，乞人憎嘅系每当闸门打开时，你都会见到啲人站满晒靠近出口处，入边就留住啲空位，唔知留畀边个咧？心谂，你地下一站就要落车了么？如果唔系，可不可以醒目啲企入去，畀人入来啊？人地都要上班噶嘛。OK，见你地咁自私仲系企喺原地郁都唔郁，咁我地就唯有逼进去咯，但系你地就V哇鬼嘈，叫我地唔好逼，面都黑晒哦。我睬你都傻啊，唔让位就逼，系你地拣嘅，我都唔想噶。 2. 仲有，每次到站要出去了，班粉肠就阻住个出口。可不可以让个位畀人先出去啊？又或者你地先企出去，畀我哋好顺畅咁出咗去，之后你再返番入来，大家唔阻大家时间，没碰撞，皆大欢喜，系咪？ 3. 果啲企喺靠近出口嘅人，到站闸打开啦，就慢条斯里咁行出去。阿哥阿姐先生安娣，你哋企喺果度唔让位，唸住你地好赶时间，要第一个飞出去，但系依家见到你地好似游魂咁飘下飘下，仲阻住条路添，真系畀佢哋激死。 4. 仲有啊！有啲就算你讲咗EXCUSE ME，佢哋好似借咗聋耳陈的耳仔听唔到嘅喔！咪好乞人憎咧？喺咁嘅情况之下，我会同盲公炳借对眼当睇佢唔到，撞住出去。 你地有冇遇到以上嘅问题咧？

今朝早行路上班途中，见到一个友族阿哥喺街边卖早餐，一般嘅马来式早餐，来来去去都系辣死你妈，炒饭炒面炒米粉，糕点之类嘅。马来式炒米粉唔知点解总系喜欢整到碎碎嘅咯。 见肚饿，就去同佢买份早餐啦。叫咗个炒米粉，加咗点三峇，只收一蚊。价钱唔单只平，态度总几好添。 "Thank you boss, have a nice day and see you again." 佢系面带笑容讲嘅，咁我当然也回敬点笑容俾人啦！ "Have a nice day to you too." 呢份早餐买咗冇时间食，只好留到中午当午餐啦！ 终于到了食晏时间啦，打开包炒米粉，食咗一啖，味道唔系好惦喔，再食一啖，真系好差喔！ 态度系几好，但系味道就真系好差咯，我唸以后都唔会同佢买架啦。一蚊系好平，但系好似唔值得咯，食冇两啖就食唔落啦，好嘥嘎！ 态度与味道，两者兼备，当然为之最好啦，但系两者选一嘅话，你会拣边嗰？ 我会拣味道咯。我系好现实嘎，俾钱买味道系享受，食落肚度嘅哦。俾钱买态度？除非钱多咯？ 有时候你会见到啲卖嘢吃嘅小摊，好多人为咗买嘢食而排队排到鬼死咁长，等得久问声： “事头婆，仲有几久才轮到我啊？” 你会畀事头婆闹嘎： “你等得就等，唔等得就去其他档口买。” 好神气系未咧？但系点解总系有咁多人愿意排队买嘅咧？排咁长，味道当然唔会差啦，唔通前世未排过队么？识相唔诸多要求，等得，人哋系唔会闹你嘅。咁如果你明知总多多要求畀人闹，咁你咪当佢耳边风咯，时运高听唔到，唔会影响你嘅心情嘎，因为系你心甘情愿排队去买嘅哦。 享受到好味道，满足到你嘅味蕾，虽然冇好态度，都值得啊！系未？

以前每日都想拥有一嗰属于自己嘅部落格，记录一啲生活嘅事，唔理大事小事，因为我总系觉得有一日我会忘记以前嘅自己。不过一切都系得嗰谂字，冇行动。 今日终于有所行动啦，希望唔系新屎坑三日香啦！ 有啲人唔喜欢回首过去，只看未来。 但系我就喜欢转嗰头向后睇，睇吓以前拥有嘅，失去嘅。。。 忘记咗带有酸味嘅喊嘅感觉，痛苦嘅笑嘅滋味， 忘记咗曾经咁傻嘅放弃，咁易接受嘅选择。 写呢一个部落格就系帮以后嘅我锁住呢啲味道。 窗外虽然下着雨，但系今日系最美丽嘅第一天！