顽石の碎碎念

其实我份人都几姿整嘎，就连我嘅工作座位亦如是，最基本要求---整齐。因为一日工作八粒钟，扣除食晏一粒钟，足足有七粒钟时间系要朝夕相对嘎喔，唔整齐点得啊？ 吖。。。你唔好误会啊，整齐唔代表工作效率差喔，张枱七国咁乱亦都唔代表好忙好能干喔。 嗱！果只黑色绑辫子，白色眼，彩色珠子衫嘅公仔系上次我去南非时买嘅手信；果只红色嘅木雕猫系来自古晋嘅；果只大头木公仔系来自曼谷嘅手信；果只香薰香皂系雅典嘅手信；果两粒大大粒嘅红豆系来自台湾淡水嘅手信；果只绑头巾嘅木公仔系来自清迈嘅手信。 我摆嗮呢啲来自唔同国家嘅手信喺我嘅电脑荧幕下方，藉此美化沉闷嘅环境，滋润视觉，仲可以嚟个世界文化交流添，哈哈。 你睇，佢哋相处得几融洽啊，真系开心。 吖。。。点解嗰大头木公仔咁嘅表情嘅？睇落有啲落寞，系因为心系家乡？忧心家乡最近发生嘅暴乱灾情？唔。。。但系睇落又似有啲喺度手舞足蹈喔，系庆幸自己逃过一劫，唔驶受苦受难？亦或为自己可以代表国家喺度宣扬文化而感到欢欣啊？ 来自台湾嘅大红豆唔驶变成八宝冰里嘅一员，身份提升为国家文化大使，喺度宣扬“知足常乐”，让每个人都觉得自己系“完美的你”。唔自卑，唔睇小自己，连红豆都会有出头天了，更何况系你，系咪？

以前中学时期要返屋企就需要行路30分钟到富都车站，等大概1粒钟，有幸逼上巴士都要企90分钟左右嘅车程正可以返到屋企。 行路30 min + 等巴士吸废气60 min x 巴士90 min = 到达家乡180 min 之后出嚟社会工作，住喺 Bandar Utama 果度，要返屋企就需行路10分钟到 1 Utama 对面嘅巴士站。搭巴士到 Pasar Seni 转 LRT 到 KL Central。喺 KL Central 等 KTM 30分钟至1粒钟左右都唔定，车程45分钟到万饶又要转坐巴士。又等个30分钟至1粒钟左右，再过40分钟左右嘅车程方可到达家乡，真系“千辛万苦”啊！ 行路10 min + 等巴士10 min x 巴士40 min + LRT 10 min - 枯等巴士浪费精神45 min + KTM 45 min / 又再枯等50 min x 巴士40 min = 到达家乡250 min 依家要返屋企就简单好多，唔驶转嚟转去。行路10分钟到 Hang Tuah 嘅 Monorail 站搭去 KL Central，跟住等个30分钟至1粒钟左右，搭 KTM 到万饶。到站后就过对面月台又等个40分钟左右，车程大概20分钟就可到达家乡啦！ 行路10 min + 等巴士10 min + Monorail 10 min - 身水身汗等45 min x KTM 45 min / 丧等40 min + KTM 20 min = 到达家乡180 min 如果 KTM 可以比较准时，跟住时间表嘅话咁就唔驶嗮咁多时间喺度等咯！ KTM，唔该提升下啲质素啦！

依家住紧嘅共管公寓甚少有蚊出现，夜晚瞓觉时甚至可以窗户大开都唔怕。 记得以前细嗰果阵，瞓嘅系被四方形嘅蚊帐保护下嘅床。再大啲，蚊帐唔用了，但系喺每扇窗都会钉上蚊纱。 每日晚上，爸爸就会喺我哋瞓觉之前就入去我哋间房打蚊。佢会摇下啲窗帘睇有冇藏匿喺入边嘅蚊，郁下啲挂喺衫架上嘅衫裤，纸箱，枕头，书架等，如果有蚊嘅话，佢哋嘅行踪就会败露，咁爸爸就会嚟一招双手合璧将啲蚊拍死。而且每个可能会藏蚊嘅地方，爸爸一定唔会错过，势要杀个片甲不留为止。之后再喺床下底喷上蚊油，戌上门焗个半小时，蚊你死未？我谂，冇蚊可以喺咁嘅情况之下仍然可以存活落去咯！ 半个小时之后，开着个抽风机，将啲难闻嘅蚊油味抽走，再过一阵，我哋就可以安枕无忧咁瞓觉啦！ 爸爸呢个习惯到依家都冇变，变嘅只是唔再喷蚊油，因为始终觉得蚊油有害健康。唔讲你唔知，其实爸爸打蚊嘅功夫真系好厉害嘎，眼界好，身手敏捷，打蚊好似打篮球咁湿碎。 自从我哋几兄弟搬咗出去住之后，爸爸就唔驶再为我哋打蚊了，但系依家因为屋企有咗个孙，所以佢晚晚都为咗个孙而打蚊，佢好享受嘎！