老戏院，旧记忆。
记得旧年5月1号为咗提早庆祝母亲节而返家乡。果次冇叫屋企人出嚟火车站接我，因为想试下慢慢行返屋企，咁就可以仔细认真咁睇下家乡依家嘅面貌。 喺我家乡有两座荒废已久嘅戏院。 呢间坐落喺新巴刹附近嘅戏院叫做 Union。喺前门嘅顶墙上可以清楚咁睇到1957呢4嗰字，谂应该系喺1957年落成。印象中由细到大好似冇嚟过呢间戏院睇戏。 透过铁栅窥探内观，室内破烂不堪，屋顶又穿窿，后台果两嗰向左向右嘅木楼梯睇落好似有啲印象，唔通喺以前细嗰果阵入过去探险？ 呢嗰铁栅入边嘅售票处好有怀旧嘅色彩，如果着上民初装企喺入边卖票，出边有几个人排队买票，镜头只集中喺呢一嗰画面，唔讲你应该都唔知你依家身处喺边一嗰年代了。 呢间坐落喺街场嘅戏院，叫乜名已经唔记得了，细嗰果阵就曾经喺呢间戏院睇过戏。以前每次有新戏上映就会挂上手绘嘅大张帆布电影布条，而喺入口处旁今日放映或即将放映嘅布告栏度就会贴上海报，甚至会贴上电影介绍及内照。 以前呢间戏院仲营业紧嘅时候，呢嗰圆柱就喺嗰售票处嚟噶，喺售票处旁就会有人喺度摆档卖零食。记得以前同屋企人喺度睇过《阿郎的故事》，每次睇戏都会买啲零食入去食噶。我仲记得呢间戏院每次放映电影前都会播放呢首《流浪之歌》。 我哋坐果啲座位咧系木凳嚟噶，即系果仲坐板可以折上嚟嘅呢！以前啲大人好中意边睇戏边咬瓜子，仲将啲瓜子壳随地丢。啲细路就中意边睇戏边讲话，唔系细声果只啊！你知啦，啲细路边系睇戏噶，见到朋友仔就一起玩，追嚟追去，跑嚟跑去。以前睇戏细路仔系免费噶，啲大人要睇戏又唔可以留底啲细路喺屋企喔，咪一起带埋嚟咯。而且以前嘅票又冇座位号码嘅，有位就任你坐，坐边度都得。 岁月催人老，眨下眼以前啲细路仔依家个个都牛高马大，而且呢间戏院已经没落咁多年咯，有边个仲会记得呢间戏院咧？