顽石の碎碎念

今日系我34岁嘅生日。 点过？喊住渡过12点咯。 点解？因为我记得过去呢几年嘅生日，我都会收到爸爸send畀我嘅祝福短讯。以前佢系唔会咁做噶，佢系个思想比较传统保守，唔善于表达自己感受嘅人。 我每年都会同爸爸庆祝父亲节，农历生日，阳历生日，久而久之，佢慢慢咁喺度改变紧自己。当我第一次收到爸爸send畀我嘅生日祝福短讯，我好意外好感动。我系个好注重生日呢个日子嘅人，对爸爸踏出改变嘅第一步而为佢感到好骄傲。 从今以后，再也收唔到爸爸嘅生日祝福短讯了。。。再也收唔到了。。。 但系我知道爸爸依然喺度祝福紧我，无论佢喺边度，我好肯定咁知道佢喺度照顾紧我哋，关心紧我哋，祝福紧我哋。系唔系啊爸爸？

4月13日-启程去曼谷 07:00    Edward 载我到 KL Central，到达 KL Central 后就即刻 check-in luggage。 07:30    搭 ERL 去 KLIA (RM35)。 08:00    到达 KLIA，跟住就帮 David 买 Dunhill Red Classic Gold。 09:10    启程去曼谷咯！ 10：15   到达曼谷 Suvarnabhumi 机场后就即刻转搭机场航线地铁到 Makkasan (35 baht) ，跟住再转搭 MRT 由 Phetchaburi 站到 Sutthisan 站 (22 baht)。到站后就喺七仔度买咗张 1 2 Call Sim Card (69 baht) call David 出嚟接我。原来佢屋企距离 Sutthisan 站系咁近嘅喔！呢5晚咧就住喺佢屋企啦，省返好多住宿费噶！ 到咗 David 屋企后，换咗条短裤，将啲钱同埋手提电话放入透明防水胶袋，准备要去参加期待已久泰国著名嘅泼水节了！好期待啊！David 话今日系泰国嘅新年，佢想去孤儿院做啲善事，都好嘅，呢班被社会忽略嘅一群都需要过新年噶嘛。咁我咧就同埋佢哋同事先去家乐富食午餐，再嚟去买啲日常用品畀啲孤儿。 其实我唔适合去呢啲地方噶，因为我眼浅，好容易就流马尿嘎！ 拜访后我哋就去食晚餐，呢度嘅环境同埋啲餸嘅味道都唔错，但系我只系喺度顾住食冇搭爹，因为我唔知佢哋嗡啲乜，佢哋讲泰文啊嘛！ 晚饭后本来要去 Sabye Sabye 按摩嘅，但系佢哋话人手唔够喔所以就唯有作罢，结果就先返屋企休息，一阵再出去 wet 过。 点知我哋全部一瞓就瞓到死嗮唔识起身。半夜三点几我无端端走起身，哎呀，一整日未冲过凉先去冲返个凉先，跟住做下啲旅游笔记。写下写下，听到远处传来有节奏嘅摇滚乐。哗！曼谷夜未眠，啲年轻人仲喺度挥霍住青春啊！我呢一趟嘅曼谷之旅，唔就系要好似佢哋咁嘅...