切莫伤情
--------------------------------------------------------
某人滴酒不沾，但系每次初识嘅人送佢酒，佢都会露出兴奋嘅笑容，举起瓶子，细心念上面嘅酒名。
果哋初识嘅人，后来成为佢嘅好朋友，都责怪佢以前好假，明明唔饮酒，却装作兴奋嘅样。
我哋成日都讲“礼轻物意重”，亦都可以讲“礼错物意重”，重要嘅系你嘅情，唔系礼。喺你以为我会好高兴收到你嘅礼物嘅情况之下，如果我话自己滴酒不沾，岂非泼你冷水？咁我哋咁日又岂能成为知交啊？
--------------------------------------------------------
一对夫妻嗌交要离婚。
“佢啱食完嘢冇洗手就摸我块脸。”太太话，“于是我哋就嗌起交嚟啦！”
“佢嫌我污漕”丈夫话，“但系佢唔谂一谂，我点解要摸佢已经皱晒皮嘅脸咧？正正系因为爱啊嘛！”
--------------------------------------------------------
以上呢两个故仔系出自于刘墉嘅《人生的真相》一书。
体谅与对等嘅回应，系人与人交往，最重要嘅原则。
我哋系咪周不时都会犯咁嘅错咧？可能我哋会话呢啲系冇心之错，冇罪。但系如果我哋细心啲，小心啲，咁唔单只唔会伤到对方，感情仲会更升温添！你话系咪？
系！虽然有啲人比较粗枝大叶，有啲人唔识点去表达自己表达感受。但人系可以改变嘎，可以为咗某啲事或者某啲人而去改变嘎，睇你要唔要改啫。唔理友情定爱情，喺唔同嘅阶段都应该会有唔同嘅感受同埋体会。
譬如话你嘅男朋友系粗枝大叶型嘅，开始嘅时候，你可能会尽量去体谅佢迁就佢。但系隔咗一段时间，你嘅男朋友就应该要慢慢去改变，唔可以话无论如何你都系会迁就佢嘅，所以佢就唔驶去改进。但系人系会改变啊嘛，每样嘢都有限度嘎。一但限度到咗，啲嘢就会唔同晒嘎啦。
当有一日你唔再去体谅佢迁就佢，佢就会觉得你变咗，或者你唔觉意疏忽咗，佢又会觉得你系咪变心咗。猜疑嘅心无声无息咁出现了，幸福嘅日子仲会长咩？粗枝大叶唔系一嗰免死金牌，系要改变嘎！习惯成自然亦都系一种问题，唔可以话你已经习惯咁对佢，又或者佢已经习惯你咁对佢而一成不变。生活要有适当嘅惊喜，日子先至唔会贫乏无趣，就算每日饮同样嘅白开水，你都会觉得日日都尝到唔同嘅味道。
一系你改变自己，一系佢改变佢自己，一系佢改变你，一系你改变佢。结果会系点？
评论
发表评论