2009留低乜嘢？

过埋今日，就真系要同2009年讲声再见啦！

回顾2009年，到底留低啲乜嘢畀自己咧？有点乜嘢成就咧？有点乜嘢遗憾咧？唔。。。唔。。。唔。。。谂咗好耐，都好似冇乜成就喔！唔系吖嘛？咁失败？唔得唔得，一定有点嘢嘅，一定有啲成就嘅，再畀我谂多少少时间。

啊！有啦！成就10大！

01. 喺今年2月过年前，分咗手，伤咗人哋嘅心，亦都帮咗人。（咁都算成就？）梗系，见到佢咁有成就我都好开心噶！再见亦是朋友，大家都过得好好，希望大家都好好咁过。
02. 今年5月安装咗网络，从此做返喺现今社会生活嘅都市人。（以前好OUT噶！乜Q都唔知！）
03. 因为有咗网络，所以有咗面子书；因为有咗面子书，所以生活唔再孤单。（搞到我生活好充足，唔再自己同自己讲话啦！）
04. 11月开始写部落格。（终于做返啲有用嘅嘢！）
05. 脾气臭咗。（乜话？！呢嗰都算成就？）知道自己嘅缺点喺边总好过唔知自己错喺边吖嘛！系咪呀？呢嗰唔系成就咩？
06. 老咗一岁。（吓？咁都得？）有得老好过冇得老啊！懵佬！
07. 变咗宅男。（少出街，唔阻街；唔乱嘥钱，需要储钱；少食快餐，唔驶咁残！）
08. 细路比以前生性咗好多，我哋嘅关系亦都比以前好。（老嚟安慰，老窦老妈子都安慰啦！）
09. 识咗多哋朋友，冇咁自闭啦。（咪识咗之后收住喺手机度孵蛋冇联络，要多啲联络沟通先之得嘎！）
10. 成就咗以上嘅成就，因为一切嘅一切都冇计划过嘎！（汗颜！！！）

哎呀！真系冇乜成就啊！冇鱼攞啲虾嚟充王添！

遗憾10大！

01. 今年冇出到国旅行！（去咗新加坡一日游算唔算啊？）
02. 带老窦老妈子出国旅行嘅计划只系计划，未实行到。（明年啦！）
03. 仲未买到属于自己嘅屋。（明年啦！）又系明年？人生有几多嗰十年啊？
04. 仲未学识游水。（包括游干水！）
05. 工作还算得，未至于高兴满足。（点解嗰嗰都掂过我？）
06. 青丝越来越少，烦恼越来越多。（青丝咪就系烦恼咩？点解青丝少而烦恼就多咧？）
07. 每次洗衫，隔日就落雨嘅，准过天气报告。（样衰，连天气都吓我，32岁啫，咁快就需要执返正啲样？）
08. 周不时畀人误会我，冤枉我。（又系衰样衰！真系需要神奇水啦！）
09. 冇真正试过豪气血拼嘅滋味，买嘢买到手攰。（银包细，钱银细，行到脚攰就时时有。）
10. 杀人放火，打人凶人，飞机撞埋纸驁；奸人掳掠，天灾人祸，地球暖化闯祸。（你唔系参加选美哦！咁娘炳嘅？）

好！过去嘅由佢过去，明年再嚟慢慢实现今年未实现到嘅梦想，跟住再实现埋明年新嘅计划。咁就为之Very Good啦！

祝福我亦都祝福大家，大家一起努力啦！