林海峰《是但嗡 X 我愿意》之乌龙事件

查实系咁嘅。

话说我有4张免费VIP票，座位号码215-218，之后朋友又畀多2张免费票213-214过我。其实之前几场演唱会佢畀我嘅票系属于PS1，PS2或者PS3区，台前位嚟嘅，咁呢次系第一次畀我VIP票，座位系喺台前前5排。

讲返正题先。因为我哋只得4个人嚟睇，咁我就多出2张票嚟啦。好啦，我打算收埋217同埋218嘅票，因为218嘅号码系我中意嘅号码。又因为另外两个朋友会迟啲正到，咁我就同另外1位朋友入场先，用咗213同埋214张票。

吖！点解咁次个位咁后嘅？以前PS1，PS2，PS3嘅票都比依家呢个位前好多，唔通前面啲位系VVIP位？冇理啦，就唯有乖乖坐喺度啦，有免费票已经算好好噶啦。

跟住啲人就陆陆续续咁入嚟。

吖！嗰对情侣坐咗217同埋218嘅位喔！有冇搞错啊，乱咁坐人哋嘅位都有嘎，好啦，畀你坐住先啦，一阵朋友到咗正叫佢哋走啦。咦！嗰两个咪我嘅朋友Tagnan同埋Ah Meng？咁巧喺度都可以遇到佢哋两个喔？哎呀！点解佢哋嘅位畀我仲前咁多嘅？冇理由嘅哦。。。点解嘅。。。佢应该唔会畀咁差嘅位过我嘎？！

突然间头顶上嘅灯胆“叮”一声着咗。

即刻攞返张票嚟睇吓先。哎呀！我哋坐咗之后攞到嗰2张差啲嘅VIP票（ROW GC）嘅位啊，另外4张VIP票（ROW VB）嘅位喺前面第5排啊！

哈哈哈，真系乌龙啦！好彩唔系喺散场之后正发现，趁依家仲未开场快快坐返个靓位先。仲有啊，头先好彩冇赶嗰对坐喺217同埋218位嘅情侣走啊，如果唔系就真系瘀到痹咯。牌佘，牌佘。