顽石の碎碎念

话咁快就到咗2010年嘅最后一日了。 我唔喜欢2010年，因为无情嘅虎爷带走咗我爸爸，令到美满嘅家庭拼图永远都却少一块，唔再美满，唔再完整。爸爸走了，但系孙女就喺爸爸100日果日出世，走咗一个又补返一个，人数系冇变，但系事实变咗就系变咗。 今年嘅我自闭好似好严重咗，锁自己喺房唔出门嘅时间越来越长。情绪反复无常，时而异常兴奋 ，时而沉默寡言，阴晴不定。宁愿封锁自己都唔愿出嚟去吓襯人。 爸爸嘅离去令到我更加跌入万丈深渊，因为系大仔，好多嘢需要我去做决定，去担当。崩溃嘅情绪唔可以表现喺块面度，只可以收埋喺心里面嘅夹万度。我原本就系嗰优柔寡断兼忧郁嘅人，心理负担好大。 2010年终于都结束了，我一啲都唔留恋。

妈妈话我嘅侄仔好似我细嗰果阵，睇落都有啲似，最似就系嗰头咯，一样咁大，十足十大头鬼啊！侄仔比我好命得多，细细嗰就影咁多相，咁又难怪嘅，以前想要架影相机咁易咩！ 我张相系喺阿嫲屋企出边度影噶，袋入面装嘅系荷兰水盖，前面果嗰系我细路，仲着住条口水绢，年份忘记咗了。 我侄仔果张系喺 Mid Valley 度影嘅，旁边果嗰系我外甥，背景系2010年嘅圣诞装饰。

此情此景已不再，一起互相扶持对方嘅终身伴侣已经阴阳相隔有124日了。 时间就算过得再快也只能冲淡心中嘅伤痛，但对对方嘅思念始终一啲都未减。呢张相系我细路偷影噶，当日佢哋去Bukit Tinggi 玩，我冇同行。爸爸好少出去旅行，一家大细一齐出去玩嘅次数更加少之又少，好在喺佢有生之年，我哋兄弟姐妹各自都有带佢老人家到处走走。我原本打算买个旅游配套畀佢哋喺结婚周年日一齐出国再度蜜月噶，但系嗰天始终都唔畀呢嗰机会我完成我嘅心愿，系都要我遗憾终生。 2007年父亲节，带爸爸到Swiss Garden 酒店食自助餐。爸爸唔敢食生冷嘢，生蚝啊，寿司啊，佢一啲都唔敢掂，只钟情于中餐，而妈妈就乜都敢试。试过带爸爸去食其他嘅食物，例如韩国餐啊，日本餐啊，西餐啊，越南餐啊，佢试过后都系中意中餐多啲。 今年元宵大家好开心咁喺邵氏广场嘅紫藤捞生，之后就嚟咗天后宫拜神影相。但系誓都谂唔到呢嗰系爸爸嘅最后一嗰元宵。。。 爸爸唱歌好好听，但系就唔中意出风头，呢张相系喺妹妹结婚时影嘅。 你睇，唱得七情上脸添。佢睇住妹妹结婚生仔，睇住细路结婚生仔，但系就赶不切睇孙女出世。孙女预产期喺11月30号，但系佢偏偏就唔肯出世，系都要等到爸爸100日（12月3号）果日至出世。 人面不知何处去，桃花依旧笑春风。依家屋企样貌依旧，只系人事已非。我嘅责任大咗，负担重咗，因为我系大仔，当然要负起一切责任。 唔知爸爸喺另外一嗰世界过得好唔好咧。我好挂住你啊！ 但愿你好似张相咁好调皮好开心咁摆起"V"手势就好啦！