人面不知何处去，桃花依旧笑春风
时间就算过得再快也只能冲淡心中嘅伤痛，但对对方嘅思念始终一啲都未减。呢张相系我细路偷影噶，当日佢哋去Bukit Tinggi 玩，我冇同行。爸爸好少出去旅行，一家大细一齐出去玩嘅次数更加少之又少，好在喺佢有生之年，我哋兄弟姐妹各自都有带佢老人家到处走走。我原本打算买个旅游配套畀佢哋喺结婚周年日一齐出国再度蜜月噶，但系嗰天始终都唔畀呢嗰机会我完成我嘅心愿，系都要我遗憾终生。
2007年父亲节，带爸爸到Swiss Garden 酒店食自助餐。爸爸唔敢食生冷嘢，生蚝啊，寿司啊，佢一啲都唔敢掂，只钟情于中餐，而妈妈就乜都敢试。试过带爸爸去食其他嘅食物，例如韩国餐啊，日本餐啊，西餐啊，越南餐啊，佢试过后都系中意中餐多啲。
今年元宵大家好开心咁喺邵氏广场嘅紫藤捞生，之后就嚟咗天后宫拜神影相。但系誓都谂唔到呢嗰系爸爸嘅最后一嗰元宵。。。
爸爸唱歌好好听，但系就唔中意出风头，呢张相系喺妹妹结婚时影嘅。 你睇，唱得七情上脸添。佢睇住妹妹结婚生仔，睇住细路结婚生仔，但系就赶不切睇孙女出世。孙女预产期喺11月30号，但系佢偏偏就唔肯出世，系都要等到爸爸100日（12月3号）果日至出世。
人面不知何处去，桃花依旧笑春风。依家屋企样貌依旧，只系人事已非。我嘅责任大咗，负担重咗，因为我系大仔，当然要负起一切责任。
唔知爸爸喺另外一嗰世界过得好唔好咧。我好挂住你啊！ 但愿你好似张相咁好调皮好开心咁摆起"V"手势就好啦！
评论
发表评论