6日5夜曼谷之旅
4月13日-启程去曼谷
07:00 Edward 载我到 KL Central，到达 KL Central 后就即刻 check-in luggage。
07:30 搭 ERL 去 KLIA (RM35)。
08:00 到达 KLIA，跟住就帮 David 买 Dunhill Red Classic Gold。
09:10 启程去曼谷咯！
10：15 到达曼谷 Suvarnabhumi 机场后就即刻转搭机场航线地铁到 Makkasan (35 baht) ，跟住再转搭 MRT 由 Phetchaburi 站到 Sutthisan 站 (22 baht)。到站后就喺七仔度买咗张 1 2 Call Sim Card (69 baht) call David 出嚟接我。原来佢屋企距离 Sutthisan 站系咁近嘅喔！呢5晚咧就住喺佢屋企啦，省返好多住宿费噶！
到咗 David 屋企后，换咗条短裤，将啲钱同埋手提电话放入透明防水胶袋，准备要去参加期待已久泰国著名嘅泼水节了！好期待啊！David 话今日系泰国嘅新年，佢想去孤儿院做啲善事，都好嘅，呢班被社会忽略嘅一群都需要过新年噶嘛。咁我咧就同埋佢哋同事先去家乐富食午餐，再嚟去买啲日常用品畀啲孤儿。
其实我唔适合去呢啲地方噶，因为我眼浅，好容易就流马尿嘎！
拜访后我哋就去食晚餐，呢度嘅环境同埋啲餸嘅味道都唔错，但系我只系喺度顾住食冇搭爹，因为我唔知佢哋嗡啲乜，佢哋讲泰文啊嘛！
晚饭后本来要去 Sabye Sabye 按摩嘅，但系佢哋话人手唔够喔所以就唯有作罢，结果就先返屋企休息，一阵再出去 wet 过。 点知我哋全部一瞓就瞓到死嗮唔识起身。半夜三点几我无端端走起身，哎呀，一整日未冲过凉先去冲返个凉先，跟住做下啲旅游笔记。写下写下，听到远处传来有节奏嘅摇滚乐。哗！曼谷夜未眠，啲年轻人仲喺度挥霍住青春啊！我呢一趟嘅曼谷之旅，唔就系要好似佢哋咁嘅咩？冇相干，我仲有5日时间，今日冇泼到水，天日仲有机会泼。
突然间谂起呢个时候嘅妈妈佢身在布新挨夜，默默咁喺度排队等天光拿牌子问米，身心多煎熬啊！而我就喺度风花雪月，内疚内疚。
第二日一早起身 10 点几就出门了， 喺 Sutthisan 站搭 MRT 到 Si Lom 站。呢个时候，清道夫喺度清理紧条街道，啲小贩就喺度准备一切，等待一阵由四面八方嚟参与泼水嘅人群，到时就好生意啦！
小叮当喷水器，可爱吧？呢班大只佬咩上咁可爱嘅小叮当系咪更加可爱咧？哈哈。。。
Si Lom 啲人潮多到好恐怖啊！你睇，夸唔夸张啊？听讲今年 Si Lom 呢度系有史以来最多人嘅一年啊。
Aloy! （好食咁解）呢啲唔知叫乜名嘅小食好好食啊！里面系香味四溢嘅椰浆，20 baht 一盒。
咪睇我周身泥咁邋遢，其实呢啲系祝福嚟噶。泰国人会喺呢个节日将呢啲泥涂喺身边嘅人嘅脸上身上，或者喺你身上泼水，呢啲系一个习俗一个祝福，你唔单止唔可以发脾气，仲要好开心咁任佢哋涂由佢哋泼。
湿完又干，干完又湿，又水淋又风吹，冻死我了。呢度啲线又唔好，电话 call 极都 call 唔入，又冇锁匙，点算好啊？由朝湿到夜晚12点几，终于返到屋企了，冲返个热水凉好舒服。David 佢仲叫我一阵一起出去 GOD 玩喔，唔该了，我好攰啊，系咁先，早抖啦！
第3日下昼出发去 1 Residence Hotel 搵朋友一起去 shopping，点知佢哋仲喺度做 gym 喔，一直拖到3点几至出门，嘥嗮啲时间。之后我哋去咗 Pratunam Market 买嘢，行冇几耐又话要赶返去酒店准备食晚餐，佢哋约咗班泰国朋友7点食晚餐喔。食完晚餐啲泰国朋友就介绍我哋今晚去 Fake Club 度泼水，果度冇咁逼夹但依然热闹好玩，系个好去处。好啦，既然佢哋咁大力推介，咁就去果度玩吓啦！
第4日，一大早起身就出门去 Chatuchak Market 嚟一轮大购物啦！
呢个椰子雪糕喺 Chatuchak Market 好著名噶，咁当然要买嚟试下啦！咦，系唔错哦！
呢个拉茶听讲连皇族都嚟光顾噶，佢可以连续转20个圈添。但系咧，我只见到佢转6个圈咋，偷工减料。如果每一次佢都要转20个圈噶话，咁佢仲驶做生意嘅？
今晚节目丰富，冇时间返去酒店冲凉，咁唯有去做 oil massage (500 baht) 顺便冲埋凉啦！间间按摩店都非常好生意，唯有等下喺啦！影返张相先，顶帽靓唔靓啊？100 baht 咋。
按摩完冲咗凉成身舒服嗮，食个晚餐跟住就去睇秀 (350 baht)。再嚟就去 DJ Station wet 吓，200 baht 两支饮品都好OK喔，但系咧就实在太多人了。逼咗入去换咗支啤酒又出返嚟门口企，都唔过瘾嘅。
第5日，David 话带我哋去水上市场行吓，呢个系本地人去嘅水上市场，所以冇乜外地人嚟噶。山长水又远，个市场好细噶咋，好安静，冇咁多小贩系咁粘埋嚟推销。跟住我哋就去咗参观几间庙，间间庙都喺度做法事，好热闹啊！
第6日，最后一日啦，我仲未买到鞋同埋包包啊！寻晚又冇时间再返去 Chatuchak Market 买，所以咧今朝起咗个早床做最后出击，一大早去咗 Pratunam Market 做最后冲刺。 但系呢度系做批发噶，一买最少要买3件，结果空手而回。时间过得真系快，咁快又要讲拜拜，David 佢帮我叫咗部的士去机场，架的士唔单只行得慢冷气又唔冻喔，仲收 200 baht 啊，贵过我搭 MRT 加埋机场航线地铁。到咗机场 check-in 完之后食完晏，至知道班机 delay 两粒钟啊！激鬼死我啦！
评论
发表评论