顽石の碎碎念

今日同班朋友喺1 Utama嘅Shogun食日本自助餐庆祝朋友嘅生日。 “你间半独立式新屋装修完未啊？” “未啊！有排啦！” “点解咁耐嘎？” “拆前面，拆后面，仲要装Zhakuci咧！唉！今年冇钱出国旅行啦！” 哗！年年都出国旅行嘅人搞到今年冇钱去旅行？间屋又装修呢度装修嗰度，一定用好多钱咯！佢大我一岁咋，有车又有楼。 “我嗰间剩系搞嗰厕所都用咗一嗰月嘅时间啦！你装修整间喔，梗系有排啦！“ 呢嗰后生过我嘅又系有车有楼。 “我嗰间冇乜装修嘎，攞到锁匙，买啲家私就入伙啦！” 佢同我同年嘅又系有车有楼。 突然间，我觉得啲碗碗碟碟变大咗，张凳变高咗，块寿司变得好大嚿，好鬼恐怖啊！我系咪好失败啊？我点解咁失败嘅？冇车又冇楼，收入又麻麻，就算出国旅行都系去啲东南亚国家，或者消费比较平嘅国家。日本，欧洲国家好似好遥远，去唔到咁。佢哋嗰嗰每年都出国旅行，埃及啦，巴黎啦，欧洲啦，台湾啦，英国啦，澳洲啦。。。 我几时可以有车又有楼咧？几时可以去边就去边咧？我真系觉得自己好失败嘎。咁系咪冇车冇楼就系失败咧？只系讲嚟安慰下自己啫。唉！失败冇？失败呵！真失败。

今日喺屋企睇咗呢部好温馨亦都好励志嘅一部电影《朱莉与茱莉亚》。 梅丽尔•斯特里普(Meryl Streep)与艾米•亚当斯(Amy Adams)系呢部电影嘅女主角。梅姐就系梅姐，总系可以演乜似乜。虽然我唔知朱莉真人系唔系真系好似佢演绎嘅咁样，佢嗰一口鼻音好浓嘅英国话，高频率似卡通嘅笑声，好嗰人特色嘅肢体动作，我谂梅姐为咗呢嗰角色一定做咗好多功课，所以我深信佢演嘅朱莉就同真嘅朱莉一样，话佢总系可以演乜似乜应该冇人会有异议。 对工作感到灰心沮丧嘅曼哈顿下城发展公司员工茱莉•鲍威尔（艾美•亚当斯Amy Adams 饰）决定用一年时间实践美国最受欢迎嘅电视名厨茱莉亚•切尔德（梅丽尔•斯特里普 Meryl Streep 饰）第一本食谱《精通法国烹饪的艺术》中嘅全部524道菜，并写部落格记录每日进展。与此同时，电影平行穿插茱莉亚•切尔德随美国新闻署任职嘅丈夫保罗•切尔德（斯坦利•塔奇 Stanley Tucci 饰）于1948年嚟到法国巴黎居住，学习烹饪，并历经十年艰辛出版厚达七百多页嘅《精通法国烹饪的艺术》过程。 一本法国料理食谱，两个唔同时代背景嘅女性，两段温馨无华嘅真实故事，524道美味佳肴，365日嘅精致生活，成就咗呢部温馨四溢，妙趣不断嘅电影。两位女主角为咗实现自我价值，一嗰积极向上乐观面对生活，一嗰永不放弃为目标而奋斗。同样地，佢哋都曾彷徨、失意，不过靠着对生活嘅热情同埋对烹饪嘅爱好，美食将佢哋从生活中拯救出嚟，将佢哋带入一个充满香气、细腻浪漫嘅世界。佢哋感受到生活嘅美好，她们得到同样嘅成功。仲有就系，佢哋亦都一样有嗰好爱佢哋嘅丈夫。 “你系我面包上嘅牛油，我生命中不可或缺嘅呼吸。”好好味嘅浪漫。 介绍呢部根据两本畅销小说朱莉娅•查尔德嘅自传《我在法国的生活》以及朱莉•鲍威尔嘅《朱莉和朱莉娅：365天，524道菜谱，1间小厨房》而改编嘅《朱莉与茱莉亚》畀大家，慢慢享受呢味食过包颊齿留香，回味无穷，唔腻唔滞嘅美食啦！

今日去咗金河剪发，理发师一睇到我就讲“点解多咗咁多白发嘅？” 噼哩啪啦！轰隆！呢一句话好有杀伤力，就好似利刃一样，杀嗰你措手不及，就好似打雷一样，吓得你濑尿咁滞。佢已经唔系第一嗰咁讲，我嘅同事，朋友都咁讲，咁即系我真嘅多咗好多白发咯？！阴公咯前世！我老咗惨咗咯！唔单止脱发，仲要畀我咁多白发，点算好咧？今年33啫，仲好后生嘎喔好冇。 一定系工作繁忙兼又烦又赶，食唔健康唔定时，瞓唔安稳瞓唔够，整死嗮我啲乌黑亮丽嘅黑发，送嗮佢哋去归西。我要去葬“发”，学林黛玉葬花，梨花带雨，冇呼天抢地，眠干睡湿。。。黑发啊黑发，你死得好惨啊。。。 一系你畀我满头白发，一系你畀我满头黑发，唔好畀几条白发嚟嘎嘎叫叫，唔欢迎佢哋啊！！！乜话？去染发？我啲头发已经好差嘎啦，又干又燥又硬，再染佢就更伤啦！发型好影响整嗰LOOK嘎，我都已经傻子LOOK咗咁多年啦，唔好玩我咧！ 未老先衰啊~~~~

寻日晏昼食晏时间，去咗公司后巷嘅唐人杂饭档买饭食。呢嗰档口不嫐都卖得唔平嘎，但系因为唔想餐餐食马来饭，所以一时半下都会去帮襯佢买饭食嘅。由于同事唔得闲落嚟打包，咁我就帮佢打包埋一份。拎咗啲洋葱炒蛋，清炒生菜，再加一嚿斋肉饼，两包一样嘅餸，跟住就畀佢计数。 “总共九块半啦。” “安娣，两盒九块半？点计嘎？两嗰都一样餸嘎喔。” “冇，一嗰多啲。” “边嗰多啲啊？” “呢嗰夹咗两嚿斋肉饼吖嘛。” “安娣，嗰啲系拌菜黄梨嚟嘎喔，边度有两嚿啊？” “哦！我以为系两嚿，咁啊。。。啊。。。呢盒都一样四块啦。。。我哋冇乱乱嚟嘅。。。哎呀，你要唔要筷子啊。。。” 哗！一嗰“以为”就要收多我块半喔，如果我冇问佢嘅话，咁咪白白畀佢赚？唔系话要同佢计较啊，系因为佢每次都收贵嘎。试过攞三样菜，冇错，系菜，蔬菜，冇肉嘎，佢计我四块半喔。驶唔驶啊？普通菜嚟嘎咋，唔系乜嘢香港芥蓝，金针菇，鬼豆苗喔。我啲同事都赖过嘢嘎，系因为呢一带食晏嚟嚟去去都系呢几档冇乜选择，所以有时都会犯贱咁送上门畀佢劏咯。 "以为”呢两嗰字好红嘎！每日都会出现系你身边，可能你系用得最多嗰只都唔定嘎。譬如“以为”你一早知道，所以冇话你知，点知原来你唔知而害你畀老细闹。“以为”你走咗，所以冇等你，点知害你等咗几粒钟。“以为”系真货好抵买而畀钱买咗，点知系假货，受骗。“以为”系老友就借钱畀佢，点知佢就当你系老襯，冇还钱。“以为”系大生意上门，点知系大贼上门打劫，财色兼收。“以为”地上拾到宝，问天问地攞唔到，点知系老千施计谋，转眼神志不清，提嗮啲钱双手奉上，唔知发生乜事。“以为”车大炮，撒手段就可以隐瞒事实扼到全世界？人在做，天在看，佢点死大家都心知肚明。“以为”色心起爽完后毁尸灭迹就可以过得心安理得？“以为”掺尿落奶度畀细路饮就冇人知？“以为”你自己好叻，万事通乜都知？“以为”你自己生得鬼火咁靓，人见人爱，车见车载？“以为”。。。 咪以为我系白痴至得嘎，随便兜就信你真系搞错计错。

乜嘢系人生？人生系乜嘢？ 呢嗰问题睇落好似好沉重，好复杂，好深奥，好难答，好大条道理。其实系唔系真系咁沉重，咁复杂，咁深奥，咁难答，咁大条道理咧？ 人生可以好简单亦都可以好复杂。 有人觉得人生好似马戏团，要似小丑咁娱乐大家，要似驯兽师咁面对困难，要似空中飞人咁接受挑战。 有人觉得人生好似大厨师，色香味要俱全，才能满足各人唔同口味嘅需求欲望。 有人觉得人生好似一盘棋，要小心翼翼咁行每一步棋，深怕一失足成千古恨。 有人觉得人生好似映画戏，有喜有愁，有笑有泪，时而高潮迭起，时而平淡如水。 有人觉得人生好似过山车，忽高忽低，一闪即过。 有人觉得人生好似炸虾饼，虾饼晒唔够发唔透，油唔滚炸唔脆口。 有人每日为咗一啲芝麻绿豆嘅事而自寻烦恼，为咗奉承大家而卑躬屈膝，为咗升职加薪而日夜颠倒，为咗荣华富贵而不折手段，为咗呢样而失果样，到底为乜咧？你可以得到整嗰世界？你可以得到万千宠爱？你可以呼风唤雨？你可以为所欲为？到最后又咪系一副白骨，化咗灰就冇咗喇！ 活得实实在在，无怨无悔，问心无愧就经已足够。试问世上有几多嗰人做得到啊？唔。。。呢嗰太难了，不如试下简单啲嘅。。。 “人生无非系笑笑人家，再畀人家笑笑咁啫。” 尽量开开心心咁过每一日应该唔会咁难呱？带啲阿Q精神做人，凡事唔驶太过认真亦都唔好太过唔认真。老土都要讲句，伤心又系咁过，开心又系咁过，点解唔选择开开心心咁过咧？