顽石の碎碎念

咁朝喺 Hang Tuah 搭手扶电梯时，喺我眼嘅水平线下见到个唔系好雅观嘅画面。有嗰女仔虽然着住对丝袜，但系依然好清楚咁睇到约0.05cm 长嘅脚毛穿过丝袜向我 say hello。睇得出佢平时应该有剃脚毛嘅，因为只有剃过嘅脚毛先至会越生越粗。 哎呀！或者人哋近排比较忙咧，冇时间去剃脚毛。但系我好奇嘅系佢着丝袜果阵冇发觉到佢嘅脚毛已经长咗嘎咩？ 哎呀！或者人哋唔够瞓，着丝袜果阵依然争取时间闭目养神咧！有时我都会闭眼刷牙，着衫，着袜，着鞋嘎。 但系其实咧。。。人哋嘅事又关我乜事啫？

好耐冇品尝到红毛丹了，平时都唔会特登去买红毛丹嚟食嘅，边度好似细嗰果阵，屋企种咗棵生得唔高嘅红毛丹树。每当满树结满嗮啲红毛丹嘅时候，啲树枝就坠嗮落嚟，垂手可得，想食几多就食几多，甚至有时直接坐喺棵树度，拿起粒红毛丹就将半边壳咬开，食咗粒香甜嘅果肉后，就让剩返半边壳嘅红毛丹依然挂喺棵树度，唔理佢。 唔单止咁啊，有时仲会拿起把剪刀帮啲红毛丹“理发”理成平头装。理成平头装嘅红毛丹好趣怪啊。哈，唔知道冇毛嘅红毛丹仲叫唔叫红“毛”丹嘅咧？ 自从唔知几时棵树搬嚟咗啲不速之客“火蚂蚁”后，就再也唔敢坐喺棵树度食红毛丹了，甚至乎就连爬树都唔敢啊！因为随时都会畀啲“红头兵”突击，到时搞到周身痕就惨啦！ 依家棵红毛丹树已经冇咗了，改种咗几棵沙梨树。依家想食红毛丹就要畀钱买嚟食了，边有以前食得咁豪咁写意啊。

一路嚟，我行路嘅速度都算几快，呢种快系出自不自觉嘅快而唔系赶时间有心嘅嗰种快。有时候朋友跟我出街都觉得很辛苦，因为要加快脚步跟上我嘅步伐，对佢哋嚟讲系一件苦差事。我试过有嗰旧同事话跟我出街就似带狗出街。点解？因为狗喺前面行，主任喺后面追咯。 旧年有一次搭 monorail 去公司准备出席喺波德申 The Legend Water Chalets 举办嘅 Department Outing。喺途中嘅巴士上接到嗰由诊所打嚟嘅电话，唔系因为我嘅健康有问题，而系有嗰人打电话去诊所要拿我嘅联络号码。而诊所嘅职员好有职业道德，冇随便将顾客嘅私人资料话畀其他人知。嗰诊所职员畀咗嗰联络电话号码过我，话果嗰人捡到我嘅银包，叫我联络佢。我听到之后就即刻摸摸嗰裤袋，我嘅银包真系唔见咗啊！ 原来呢嗰世界上咁老实嘅人仲存在嘎喔！ 抄底咗个联络电话后就即刻联络果嗰人。佢叫 Mr. Wong ，佢话当 monorail 到 Bukit Nanas 站时，我起身后就即刻转身走人，佢捡起我嘅银包就追出嚟，点知一转眼就唔见咗人喔。有一点我要赞佢咯！我觉得佢好醒咯，识得打去诊所问我嘅联络电话。之后我话佢知我去紧波德申，两日后会返嚟吉隆坡，到时会再联络佢见面。 喺两日后嘅早晨9点钟，我仲瞓紧觉，突然间手机响起，原来系 Mr. Wong 打嚟，佢叫我10点钟到 Sri Petaling 嘅 LRT 站搵佢攞返嗰银包。哗！佢仲心急过我喔！就因为佢太过好心反而令我觉得要特别小心，话我小人之心度君子之腹都要嘎啦！ 我约咗住喺 Sri Petaling 嘅朋友去 LRT 站等我以防万一，跟住就即刻梳洗搭 LRT 去 Sri Petaling。到站后已经10点15分了，拨咗嗰电话畀 Mr. Wong。Mr. Wong 系嗰中年男子，戴眼镜，个子唔高。佢见到我后就闹我，话依家啲后生仔好冇时间观念，约你10点，你就迟到，又话佢原本想走人嘎啦等等，嗰手仲拎住我嘅银包。我其实已经好赶嘎啦，由我房仔去 LRT 站都要10分钟，跟住仲要等 train 咧，控制唔到嘎嘛！咁我唯有道歉兼听佢教训咯。之后佢就畀返嗰银包过我，仲叫我检查睇吓有冇唔见嘢添！ 哗！果然一蚊都冇少到喔！难得嘅老实人，真系好多谢佢呀。但系另一边厢又觉得好抱歉，因为之前曾怀疑过佢嘅为人咯！ 原来行得快唔一定好世界嘎喔！

俗语都有话“水能推舟亦能覆舟”。 其实人亦如是。 人可以帮你亦都可以害你。今日帮你飞黄腾达，天日害你家破人亡。呢一刻喺你面前就菩萨咁款，赞你几好几好，下一刻喺你背后就阴险毒辣，插你千刀万刀。所以做人时时要张大对眼，睇清睇楚，睇吓喺嗰笑容入面有冇利刃，小心杀个你措手不及。帮人亦都要小心行事，小心一招借花敬佛就令你一无所有。 最近害怕人群，总喜欢待喺房里做宅男，觉得好安静，好安全。周末都待喺房里睇电影上网，冇出街，冇接触人群，好舒服。但系又觉得自己好自闭，好脱节，唔知点好。 其实呢嗰世界有“心”人有好多，点避都冇用，因为喺佢哋嘅面上系冇写字话畀你知佢系好有“心”嘎。点知佢有心冇心？如果睇唔清嘅就唯有试过之后学精咯，做过老襯之后就咪再做啦！ 仲知小心有“心”人啦朋友！

人生有几多嗰十年？呢嗰系柴九嘅名句。 人生真系有几多嗰十年咧？ 今朝早6点几就起身准备去行清拜祭阿爷同埋阿嫲。阿爷喺我未出世，妈妈未嫁畀爸爸时就已仙游了。 阿爷生于光绪33年，终于1971年，享年64岁。 阿嫲生于1920年十一月初十一，终于2000年十一月初八，享年80岁。 阿嫲16岁就嫁畀阿爷了，阿爷当年29岁，相差13年。 喺阿嫲未仙游之前，嚟拜祭过阿爷一次。第二次嚟行清就喺今年嘅清明节前一日星期日，呢次系拜祭阿爷同埋阿嫲。 睇一睇阿嫲嘅墓碑正知道原来阿嫲仙游已10年了，今日系我第一次嚟拜祭佢老人家。10年了，时间过得真系快，一闪即过。一路嚟，我时不时都会突然间好想念阿嫲，有时仲会眼湿湿。 记得细嗰时阿嫲好锡我呢嗰孙，甚至有啲宠我，佢会买玩具畀我玩，买嘢畀我食。记得有一日早晨，阿嫲嚟到我屋企，叫醒我，跟住喺佢衫袋度攞出一对玩具兔子，呢嗰玩具系黑人牙膏送嘅，一大一细。喺兔子身体入面有嗰磁铁，所以当你将一只兔子放喺另外一只兔子面前时，另外一只兔子会向后转。一嗰唔系好值钱嘅玩具，但系却令我记到依家，系因为之间有爱，婆孙之间嘅爱。 阿嫲中风入院未到一嗰礼拜就撒手归西了，仲有几日就系佢老人家嘅大寿。阿嫲入院，我都未有去探佢佢就咁走了。当我接到妈妈打嚟嘅电话通知我阿嫲走咗时，我正喺路上要去出席朋友嘅生日聚会。妹妹话比我知话阿嫲一直同佢讲佢生日时乜嘢都唔要，只要畀佢食一只猪脚醋就够了。佢应该知道自己时间无多惊过唔到呢嗰生日，所以。。。 我好后悔冇去探望阿嫲，当我见到佢最后一面时佢已经系一嗰冰冷嘅躯体了，我已经唔记得我哋最后一次倾偈系喺几时了。 10年了，原来已经10年了，10年我正第一次嚟拜祭你，好唔应该啊！因为今年系妈妈负责，佢安排喺星期日，所以今年嘅清明有好多人嚟拜祭阿爷同埋阿嫲。佢哋嘅仔啦，媳妇啦，孙啦，孙媳妇啦，孙嘅仔啦共17人。仲有今日嘅天气好有人情味，天气虽晴朗但唔嗮，可以畀我哋逗留耐一啲。 以后我要多嚟拜祭阿爷同埋阿嫲，清明一年只得一日，点忙都可以安排出时间嘅。 人生有几多嗰十年啊？